Sunday, December 13, 2009

ಮನಸೆಂಬ ಅಲೆಮಾರಲ್ಲಿ




ಭಾನುವಾರದ ಸಂಜೆ
ಭಾವನೆಗಳ ಸಂತೆ
ಮಾಡಲೇನೂ ಕೆಲಸವಿಲ್ಲದೆ
ಧೂಳೊರೆಸಲು ಕುಳಿತೆನಲ್ಲ

ಪುಟ್ಟದ್ಯಾವುದೋ ಅಂಗಿ
ಜಿರಲೆ ತಿಂದ ಜೇಬು
ಅಜ್ಜನಲ್ಲವೆ ಕೊಡಿಸಿದ್ದು?
ಇರಲಿ,
ನಾನಜ್ಜನಾಗುವವರೆಗೂ
ಇದು ಬದಿಯಲ್ಲಿರಲಿ

ಮಾಸಿದ ಫೋಟೋ
ಹಲ್ಲೊಂದುದಿರಿದ ಬಾಯಿ
ಜೊತೆಯಲ್ಲಿರುವುದಾರು?
ಅರೆ,
ನಿನ್ನೆ ತಾನೇ ಬಂದಿದ್ದನಲ್ಲ

ಇಲಿ ತಿಂದ ಪುಸ್ತಕ
ಅಪ್ಪ ಅಮ್ಮನ ಚಿತ್ರ!
ನನ್ನ ಮಗ ನನ್ನ
ಗೀಚುವವರೆಗೂ
ನನ್ನಮ್ಮನ ಪಾಲಿಗಿದಿರಲಿ

ಗಾಳಿ ಸೋರಿದ ಚೆಂಡು
ನೆನಪುಗಳ ದಂಡು
ಆಡಿದ ಪಂದ್ಯಗಳೆಲ್ಲವೂ
ಒಂದು ಬಾರಿ ರಿವೈಂಡು

ಇದ್ಯಾವುದು ಪ್ರಶಸ್ತಿಪತ್ರ
ನೃತ್ಯದಲ್ಲಿ ಸಮಾಧಾನ
ಒಮ್ಮೆ ನಾನೂ ನರ್ತಿಸಿದ್ದೆನಲ್ಲ
ಮನಸಿಗಷ್ಟೇ ಸಮಾಧಾನ

ಭಾನುವಾರದ ರಾತ್ರಿ
ನೆನಪುಗಳದೇ ಜಾತ್ರೆ
ಅರೆ,
ಧೂಳೊರೆಸುವುದೇ ಮರೆತೆನಲ್ಲ!

15 comments:

  1. ಬಾಲ್ಯದ ನೆನೆಪುಗಳ ಮೆಲುಕು ಅದ್ಭುತವಾಗಿ ಮೂಡಿದೆ.
    ಚೆ೦ದದ ಕವನ ಆನ೦ದ.

    ReplyDelete
  2. ಆನಂದ್,
    ಕವನ ತುಂಬಾ ಚೆನ್ನಾಗಿದೆ. ಬಹುಶ ಎಲ್ಲರು ಈ ರೀತಿ ತಮ್ಮ ಹಳೆಯ ಘಟನೆಗಳನ್ನ ನೆನಪು ಮಾಡಿಕೊಳ್ತಾರೆ ಅನ್ನಿಸುತ್ತೆ.

    ReplyDelete
  3. ನೆನಪುಗಳ ಜಾತ್ರೆ ಚೆನ್ನಾಗಿದೆ.

    ReplyDelete
  4. ನೆನಪುಗಳ ಜಾತ್ರೆಯಲ್ಲಿ ಕಳೆದು ಹೋಗಿ ಧೂಳೊರೆಸಲು ಮರೆತು ಬಿಟ್ಟಿರಾ...? ಚೆ೦ದದ ಕವನ.. ಭಾವ...

    ReplyDelete
  5. ಆನಂದ,
    ತುಂಬ ಸೊಗಸಾದ ಕವನ ಬರೆದಿರುವಿರಿ. ಅಭಿನಂದನೆಗಳು.
    ಇಲ್ಲಿ ಹಾಕಿದ ಚಿತ್ರ ಸಹ ಸೊಗಸಾಗಿದೆ. ಅದರದೇ ಧೂಳು ಒರೆಸಲು ಹೋಗಿದ್ದಿರಾ ಹೇಗೆ?

    ReplyDelete
  6. ಕವನ ಮೆಚ್ಚಿದ ನಿಮಗೆಲ್ಲರಿಗೂ ಧನ್ಯವಾದಗಳು
    ಸುನಾಥ ಕಾಕಾ, ಊರಿಂದ ಅಪ್ಪ ಅಮ್ಮ ಬರ್ತೀವಿ ಅಂತ ಹೇಳಿದ್ರು...(Bachelor's room) ಮನೆ ಸ್ವಚ್ಛಗೊಳಿಸ್ತಿರಬೇಕಾದ್ರೆ ಇದು ಹೊಳೀತು :)

    ReplyDelete
  7. ಆನಂದ್,
    ನೆನಪುಗಳ ಕವನ ಸೊಗಸಾಗಿದೆ....

    ReplyDelete
  8. ನೆನಪುಗಳ ಜಾತ್ರೆ...ತು೦ಬಾ ಚೆನ್ನಾಗಿದೆಯಪ್ಪಾ...ನಿಮ್ಮ ಕಲ್ಪನೆ.. ಹೋಲಿಕೆ ಎರಡೂ...
    ಮನಸಿನ ಅಲೆಮಾರಿನಿ೦ದ ಇನ್ನಷ್ಟು ನೆನಪು ಹಾಗೂ ಕಲ್ಪನೆಗಳನ್ನು ರೀವೈ೦ಡ್ ಮಾಡಿ
    ಬರೆಯಿರಿ... ಧನ್ಯವಾದಗಳು...

    ReplyDelete
  9. ಭಾನುವಾರದ ಸಂಜೆ
    ಭಾವನೆಗಳ ಸಂತೆ...

    ಭಾನುವಾರದ ರಾತ್ರಿ
    ನೆನಪುಗಳದೇ ಜಾತ್ರೆ...

    Excellent Anand!!!

    ReplyDelete
  10. ಕವನ ತುಂಬಾ ಚೆನ್ನಾಗಿದೆ ಸರ್..
    ನಿಮ್ಮವ,
    ರಾಘು.

    ReplyDelete
  11. ತುಂಬಾ ಚೆನ್ನಾಗಿದೆ ಸಾಲುಗಳು
    ಬಹಳ ಇಷ್ಟವಾಯಿತು

    ReplyDelete
  12. ನೆನಪು ತುಂಬಾ ಚೆನ್ನಾಗಿದೆ ...ಆ ಫೋಟೋದಲ್ಲಿರುವ ಚಿತ್ರ ಸೂಪರ್ ಮೂರುಮಕ್ಕಳಿಗೂ ಒಳ್ಳೆ ಹಲ್ಲುಗಳಿವೆ ಹಹಹಹ.....ಭಾನುವಾರ ಧೊಳು ಕೊಡವದಿದ್ದರೇನಂತೆ ಮುಂದಿನವಾರ ಬರುತ್ತೆ ಆಗ ಮಾಡಿದರಾಯಿತು ಹಹಹಹ ಚೆನ್ನಾಗಿದೆ...

    ReplyDelete
  13. ಇಲಿ ತಿಂದ ಪುಸ್ತಕ
    ಅಪ್ಪ ಅಮ್ಮನ ಚಿತ್ರ!
    ನನ್ನ ಮಗ ನನ್ನ
    ಗೀಚುವವರೆಗೂ
    ನನ್ನಮ್ಮನ ಪಾಲಿಗಿದಿರಲಿ

    ಚೆಂದದ ಸಾಲು

    ReplyDelete
  14. Hey, nice... tumbaa chennag bareeteera......

    ReplyDelete