Sunday, November 29, 2009

ಅತ್ತ ಇತ್ತಗಳ ನಡುವೆ




ಹಸಿರು ನೋಡಿದ ಮೇಲೆ
ನೀಲಿ ನಭದ ಕೆಳಗೆ
ಪಟಪಟನೆ ಬಡಿದ ರೆಕ್ಕೆ...
ಹುಚ್ಚೀ,
ಕವಿತೆ ಬರೆವುದು ಹಾಗಲ್ಲ

ಕೈಯಲ್ಲಿ ಪೆನ್ನು
ಸ್ವಚ್ಛ ಬಿಳಿ ಹಾಳೆ
ಶಬ್ದ ಸ್ಖಲಿಸಿದಾಕ್ಷಣ
ಕವಿತೆ ಹುಟ್ಟುವುದಿಲ್ಲ

ಸಾಲಲ್ಲೊಂದು ಮಿಂಚು
ತಾಕಿದರೆ ಸಾಕು ಎದೆಯಂಚು
ಅಲ್ಲಲ್ಲಿ ಇಣುಕುವ ಪದ
ಗಳಿಗಿರಲಿ ನೆನಪಿನ
ಒನಪು ವೈಯಾರ

ಅಲ್ಲಲ್ಲಿ ನಿಂತು, ಕೆಲವೊಮ್ಮೆ ಓಡಿ
ನುಗ್ಗಿ, ಮುನ್ನುಗ್ಗಿ ಭೋರ್ಗರೆವ
ಭಾವನೆಗಳ ಹರಿವಿರಲಿ
ಶಾಂತ ಸರಸ್ಸಿನ ಗಾಂಭೀರ್ಯ ನೆನಪಿರಲಿ

ಎಷ್ಟೆಲ್ಲಾ ಬರೆದ ಮೇಲೂ
ಕವಿತೆ ಕವಿಯ ಸ್ವತ್ತಲ್ಲ
ನಿನ್ನೆ ಬರೆದ ಕವಿತೆ
ನಾಳೆಗಿರುವುದಿಲ್ಲ




ಶಬ್ದ, ಪ್ರತಿಶಬ್ದ
ಬಿಂಬ, ಪ್ರತಿಬಿಂಬ
ಚಿನ್ಹೆ, ಪ್ರಶ್ನೆಗಳ ಮಧ್ಯೆ
ಕಳೆದು ಹೋದೀಯ ಎಚ್ಚರ
ಗೆಳತೀ,
ಬದುಕೆಂಬುದು ಕವಿತೆ ಬರೆದಂತಲ್ಲ

6 comments:

  1. "ಕವಿತೆ ಬರೆವುದು ಹಾಗಲ್ಲ......"
    ಅಂತ ಹೇಳುತ್ತಲೆ ಸೊಗಸಾದ ಕವಿತೆ ಹೆಣೆದಿದ್ದೀರ.....
    ಚೆನ್ನಾಗಿದೆ....

    ReplyDelete
  2. ಆನಂದ... :) ಸೂಪರ್ ಆಗಿ ಇದೆ...
    ನಿಮ್ಮವ,
    ರಾಘು.

    ReplyDelete
  3. ಆನಂದ..
    ಕವಿತೆ ಬರೆಯೋದ್ರಲ್ಲಿ ಮೈ ಮರೆತು ಬದುಕೋದನ್ನೇ ಮರೆತು ಬಿಡ್ಬೇಡ.. ಬದುಕು ಕವಿತೆ ಬರೆದಂತೆ ಅಲ್ಲ ಅಂತ ಹೇಳ್ತಾನೇ ಒಂದು ಸುಂದರ ಕವಿತೆ ಬರೆದಿದ್ದೀರಾ.. ನಿನ್ನೆ ಬರೆದ ಕವಿತೆ.. ನಾಳೆಗಿರುವದಿಲ್ಲ...!! ನಿಜವಾದ ಮಾತು... ಬರೆಯೋವರೆಗೆ ಮಾತ್ರ ಕವಿತೆ ಕವಿಯದ್ದು.. ನಂತರ ಅದು ಬೇರೆಯವರ ಸ್ವತ್ತು... ತುಂಬಾ ಚೆನ್ನಾಗಿದೆ... :)

    ReplyDelete
  4. ಆನಂದ್, ಚನ್ನಾಗಿವೆ ಸಾಲುಗಳು
    ಎಷ್ಟೆಲ್ಲಾ ಬರೆದ ಮೇಲೂ
    ಕವಿತೆ ಕವಿಯ ಸ್ವತ್ತಲ್ಲ
    ನಿನ್ನೆ ಬರೆದ ಕವಿತೆ
    ನಾಳೆಗಿರುವುದಿಲ್ಲ
    ಮೈ ಪಲ್ ದೋ ಪಲ್ ಕಾ ಶಾಯರ್ ಹೂಂ ಎನ್ನುವ ಹಳೆಯ ಕಭಿ-ಕಭಿ ಚಿತ್ರದ ಗೀತೆ ನೆನಪಿಗೆ ಬರುತ್ತೆ...

    ReplyDelete
  5. tumba ishtavaaytu ee kavite.. over all blog lekanagaloo mastagive..

    ReplyDelete